मुंबई : गेल्या अनेक वर्षापासून मुंबई जिल्हा बँकेवरचे प्रवीण दरेकरांचे वर्चस्व आता संपुष्टात आलं आहे. दरेकर यांनाहा मोठा धक्का आहे. भाजपविरोधात शिवसेना आणि राष्ट्रवादीच्या खेळीमुळे मुंबै बॅंकेची सूत्रे भाजपकडून गेल्याची चर्चा आहे. मुंबै बॅंकेच्या निवडणुकीत मिलिंद नार्वेकरांच्या खेळीमुळे ही संपूर्ण बाजी पलटल्याचे बोलले जात आहे. सगळ्यांनी एकत्रित येऊन ही खेळी केली असल्याची प्रतिक्रिया भाजपचे नेते प्रवीण दरेकर यांनी दिली. महाविकास आघाडीने केलेल्या खेळीमुळे आता राष्ट्रवादीचे सिद्धार्थ कांबळे हे मुंबै बॅंकेचे नवे अध्यक्ष, भाजपचे विठ्ठल भोसले उपाध्यक्ष झाले आहेत.
निवडणुकीपूर्वी आज सह्याद्री अतिथीगृहावर उपमुख्यमंत्री अजित पवार आणि पर्यटनमंत्री आदित्य ठाकरे यांच्या सूचनेनुसार शिवसेना आणि राष्ट्रवादीचे मुंबई बँकेतील प्रतिनिधींची महत्वाची बैठक पार पडली. या बैठकीला शिवसेना सचिव मिलिंद नार्वेकरही उपस्थित होते. या बैठकीत शिवसेना आणि राष्ट्रवादी काँग्रेसच्या आघाडीवर शिक्कामोर्तब करण्यात आलं. त्यानंतर दोन्ही पक्षातील नेत्यांनी मिळून मुंबई बँकेवरील भाजपच्या वर्चस्वाला धक्का देत सत्ता परिवर्तन करण्याची रणनिती आखली. त्यानुसार अध्यक्षपदी राष्ट्रवादी काँग्रेसचे सिद्धार्थ कांबळे, तर उपाध्यक्षपदी शिवसेनेचे अभिषेक घोसाळकर यांची उमेदवारी जाहीर करण्यात आली. तसंच शिवसेना आमदार सुनील राऊत आणि शिल्पा सरपोतदार यांच्यावर महत्वाची जबाबदारी दिली जाणार असल्याचंही समजतं.
शिवसेना नेते आदित्य ठाकरे यांनी स्वत: या निवडणुकीची सूत्रं हाती घेत भाजपच्या प्रवीण दरेकरांना धक्का दिला आहे. महाविकास आघाडीचे सिद्धार्थ कांबळे हे विजयी झाले असून त्यांनी भाजपच्या प्रसाद लाड यांचा पराभव केला आहे. राष्ट्रवादी काँगेसचे सिद्धार्थ कांबळे यांना ११ मते मिळाली, तर भाजपच्या प्रसाद लाड यांना ९ मतं मिळाली आहेत. सिद्धार्थ कांबळे हे राष्ट्रवादीचे नेते असून त्यांनीच गेली अनेक वर्षे राष्ट्रवादीची कमान सांभाळली आहे. त्यांच्याच कामाचा अनुभव या निवडणुकीत कामाला आल्याचं सांगण्यात आलं आहे. दरम्यान, मुंबई बँकेचे अध्यक्षपद हे एक वर्षानंतर शिवसेनेला देण्यात येणार आहे.
अध्यक्षपदावर महाविकास आघाडीने बाजी मारली असली तरी उपाध्यक्षपद भाजपच्या गळ्यात पडलं आहे. उपाध्यक्षपदासाठी महाविकास आघाडीच्या वतीने शिवसेनेचे अभिषेक घोसाळकर आणि भाजपचे विठ्ठल भोसले यांच्यात थेट लढत झाली. यामध्ये दोन्ही उमेदवारांना समसमान मतं मिळाल्याने चिठ्ठी टाकून उपाध्यक्ष निवडण्याचं ठरलं. यामध्ये भाजपच्या विठ्ठल भोसले यांनी बाजी मारली.
सरकार यंत्रणेचा दबाव : दरेकर
मी विधान परिषदेचा विरोधी पक्षनेता असल्यानेच महाविकास आघाडीने अशा प्रकारची खेळी केल्याचा आरोप दरेकर यांनी केला. आम्ही एकत्रित निवडणूक लढवली होती. त्यावेळी पक्षाचा अभिनिवेश नव्हता. पक्षाची पादत्राणं बाजूला ठेवून ही निवडणूक लढली गेली. त्यामुळे ठरवून त्याठिकाणी जे निवडणुकीत ठरलं होतं की राजकारण विरहित सगळ्यांनी एकत्र काम करायचं त्याला धक्का दिला गेलाय. एकत्रितपणे आम्ही बँक चालवत होतो. सहकारात हे होत राहतं. बँकेच्या उत्कर्षासाठी आम्ही काम करत राहू. सगळ्या विजयी उमेदवारांचं मी अभिनंदन करतो, असं दरेकरांनी म्हटलं आहे.
उपाध्यक्ष पदासाठी समसमान मतदान मिळाले आहे. विष्णु भोमरे यांचे मत फुटल्यानेच अध्यक्षपद निसटल्याची कबुली त्यांनी दिली. उपाध्यक्षपद मात्र शाबुत असल्याचे ते म्हणाले. राज्याचे उपमुख्यमंत्री अजित पवार आणि मुख्यमंत्री यांनी जातीने लक्ष घालून सरकार यंत्रणेचा दबाव मतदारांवर घातला. त्यामुळेच सरकारी यंत्रणेच्या वापरामुळेच मतदार फुटल्याची प्रतिक्रिया दरेकरांनी दिली. या निवडणुकीत भाजपच्या प्रसाद लाड यांचाही पराभव झाला आहे.
