मुंबई: कांदिवली येथील हिरानंदानी हेरिटेज गृहनिर्माण सोसायटीमधील बोगस लसीकरण प्रकरणी पोलिसांनी चार जणांना अटक केली असून अजून तीन ते चार जण फरार आहेत. या ग्रुपने मुंबईत नऊ ठिकाणी अशाप्रकारे कोविड प्रतिबंधक लसीकरण शिबीरं आयोजित केल्याची धक्कादायक बाबही उघड झाली आहे.
हिरानंदानी हेरिटेज सोसायटीमधील बोगस लसीकरण प्रकरण उघडकीस आल्यानंतर खळबळ उडाली आहे. या प्रकरणाची गंभीर दखल घेत एकीकडे महापालिकेने चौकशीचे आदेश दिले असतानाच दुसरीकडे पोलिसांचा तपासही सुरू झाला आहे. कांदिवली पोलीस ठाण्यात याबाबत गुन्हा दाखल झाल्यानंतर आज चार जणांना अटक करण्यात आली आहे. अजून तीन ते चार जण फरार असल्याचे पोलिसांकडून सांगण्यात आले आहे.
बोगस लसीकरण प्रकरणी आतापर्यंतच्या तपासात धक्कादायक बाबी उघड झाल्या आहेत. या ग्रुपने केवळ हिरानंदानी हेरिेटेज गृहनिर्माण सोसायटीतच नाहीतर मुंबईत नऊ ठिकाणी अशाप्रकारे शिबीरं आयोजित केली होती व प्रत्येक ठिकाणी किमान २०० जणांनी लस घेतल्याचे समोर आल्याने तपासाची व्याप्ती वाढली आहे. सर्व संबंधित ठिकाणी आता पोलिसांकडून तपास केला जाणार आहे. लसीकरणासाठी महापालिकेची कोणत्याही प्रकारची परवानगी घेतली नसल्याचेही पोलिसांच्या प्राथमिक तपासातून उघड झाले असून लसीकरण शिबीराच्या वेळी कुणीही वैद्यकीय अधिकारी उपस्थित नव्हते, असेही स्पष्ट झाले आहे. शिबीरात वापरण्यात आलेली लस कोणत्याही अधिकृत पुरवठादाराकडून घेतलेली नसल्याचेही समोर आले आहे.
कांदिवली येथील हिरानंदानी हेरिटेज गृहनिर्माण सोसायटीत आयोजित केलेल्या लसीकरण मोहिमेत ३९० रहिवाशांना लसमात्रा देण्यात आली होती. मात्र, त्यांनतर हा सर्व प्रकार बनावट असल्याचे समजताच मुंबई महापालिका यंत्रणा खडबडून जागी झाली. हा नेमका प्रकार कसा घडला, याबाबत विविध चर्चा सुरू आहेत. बनावट कोविड लसीकरण हा रहिवाशांच्या जीवाशी खेळ असल्याची भावना नागरिकांमध्ये निर्माण झाली आहे. या परिस्थितीत पालिका यंत्रणांनीही त्याची दखल घेत संपूर्ण चौकशी करण्याचे आदेश दिले आहेत. याप्रकरणी राज्य सरकारनेही चौकशीचे आदेश देत अहवाल मागवला आहे.
