तेजस्वी प्रकाशला ‘बिग बॉस १५’चे जेतेपद

मुंबई : धमाकेदार ‘बिग बॉस १५’ च्या ग्रँड फिनालेत रात्री १२ च्या ठोक्याला विजेत्याच्या नावाची घोषणा झाली आणि सेटवर एकच जल्लोष झाला. तेजस्वी प्रकाश या या स्पर्धेची विजेती ठरली, तर प्रतिक सहजपाल उपविजेता ठरला.

करण कुंद्रा, प्रतिक सहजपाल, तेजस्वी प्रकाश, शमिता शेट्टी आणि निशांत भट्ट या पाच फायनलिस्टमध्ये बिग बॉसच्या ट्रॉफीसाठी मोठी चुरस पाहायला मिळाली. अखेरच्या क्षणाला निशांत भट्ट आणि शमिता शेट्टी हे दोघं बाद झाले आणि प्रतिक सहजपाल, करण कुंद्रा व तेजस्वी प्रकाश असे टॉप ३ फिनाले रेसमध्ये उरले होते.

या तिघांमधून ‘बिग बॉस १५’चा विजेता कोण होणार? याकडे सर्वांचे लक्ष लागले असताना करण कुंद्राही बाद झाला आणि तेजस्वी व प्रतिक असे टॉप २ स्पर्धक विजेतेपदाच्या शर्यतीत उरले. यापैकी कोण जिंकणार, याची उत्सुकता शिगेला पोहोचली असताना सलमानने तेजस्वी प्रकाशच्या नावाची घोषणा केली. तेजस्वीला बिग बॉसची ट्रॉफी सोपवण्यात आली. ‘बिग बॉस १५’ची ट्रॉफी उंचावताना तेजस्वीच्या चेह-यावरचा आनंद बघण्यासारखा होता. ‘बिग बॉस १५’ची ट्रॉफी जिंकल्यानंतर तेजस्वीने चाहत्यांचे मनापासून आभार मानले.

बिग बॉसच्या घरातील तेजस्वीचा प्रवास एकदम धमाकेदार ठरला. करण कुंद्रासोबतची तिची रोमॅन्टिक केमिस्ट्री चांगलीच गाजली. ‘बिग बॉस १५’च्या घरात तेजस्वी व करण कुंद्रा यांचा लव्ह केमिस्ट्री चर्चेचा विषय ठरली होती.

९ वर्षांचा मुलगा आणि १८ वर्षाच्या मुलीच्या लग्नावर आधारित टेलिव्हिजनची वादग्रस्त मालिका ‘पहरेदार पिया की’मध्ये दिसलेली अभिनेत्री तेजस्वी प्रकाश ‘खतरों के खिलाडी १०’या रिअ‍ॅलिटी शोमध्ये दिसली होती. संस्कार, स्वरागिनी, पहरेदार पिया की, रिश्ता, कर्णसंगिनी अशा अनेक मालिकांमध्ये ती झळकली. टीव्हीवर कायम देसी अवतारात दिसलेली तेजस्वी ख-या आयुष्यात प्रचंड ग्लॅमरस आहे. रोहित शेट्टीच्या ‘खतरों के खिलाडी १०’मध्येही तेजस्वीचा जलवा पाहायला मिळाला होता. रोहितची ती फेवरेट कंटेस्टंट बनली होती.

तेजस्वी सोशल मीडियावर प्रचंड अ‍ॅक्टिव्ह आहे. इन्स्टाग्रामवर तिचे अनेक बोल्ड व ग्लॅमरस फोटो तुम्हाला दिसतील. तेजस्वीच्या ‘पहरेदार पिया की’ हा शो चांगलाच वादात सापडला होता. या शोवर लोकांनी तीव्र आक्षेप नोंदवल्यावर तो बंद करण्यात आला होता. तेजस्वी ही इंजिनिअर आहे. मुंबई युनिव्हर्सिटीतून तिने इलेक्ट्रॉनिक्स व टेलिकम्युनिकेशन्समध्ये इंजिनिअरिंगची पदवी घेतली आहे.

करण कुंद्राला ट्रॉफीनं दिली हुलकावणी

करण कुंद्रा हा या सीझनच्या विजेतेपदाचा मोठा दावेदार मानला जात होता. पण टॉप ३ मध्ये येऊनही करणला अखेरच्या क्षणी बिग बॉसच्या ट्रॉफीनं हुलकावणी दिली. करण कुंद्रा, तेजस्वी प्रकाश आणि प्रतिक सहजपाल हे तिघं फिनालेमध्ये टॉप ३ मध्ये पोहोचले होते. या तिघांमधून बिग बॉसची चकाकती ट्रॉफी कोण जिंकणार, याची उत्सुकता शिगेला पोहोचली असताना करण कुंद्रा टॉप ३ मधून बाद झाला. प्रतिक व तेजस्वीला मिळालेल्या मतांच्या तुलनेत करण पिछाडला आणि त्याला तिसऱ्या स्थानावर समाधान मानावं लागलं.

करण कुंद्रा तरूणाईमध्ये प्रचंड लोकप्रिय आहे. त्यामुळे तोच हा शो जिंकणार, असा अंदाज बांधला गेला होता. तेजस्वी प्रकाशसोबतच्या त्याच्या रोमॅन्टिक केमिस्ट्रीची घरात जोरदार चर्चा होती. नॅशनल टीव्हीवर करण व तेजस्वीने एकमेकांवरच्या प्रेमाची कबुली दिली होती. ही जोडी टॉप २ मध्ये असणार आणि यापैकी एक जण बिग बॉसची ट्रॉफी जिंकणार, असा कयास होता. पण करण कुंद्रा अखेरच्या क्षणी बाद झाला.

शमिता शेट्टी अखेरच्याक्षणी ‘टॉप ४’मधून आऊट

निशांत भट्ट बिग बॉस १५ फिनालेच्या रेसमधून बाहेर पडला आहे. रश्मी देसाई आधीच फिनालेमधून बाहेर पडली होती. आज निशांतनेही १० लाखांची रक्कम घेऊन बिग बॉसच्या फिनाले रेसमधून बाहेर पडण्याचा निर्णय घेतला. त्याच्यानंतर शमिता शेट्टी, तेजस्वी प्रकाश, करण कुंद्रा व प्रतिक सहजपाल असे चार स्पर्धक उरले होते. या चौघांमधून टॉप ३ ची निवड झाली आणि यादरम्यान शमिता शेट्टी फिनाले रेसमधून बाद झाली आहे. साहजिकच शमिता बाद झाल्याने तिच्या चाहत्यांना मोठा धक्का बसला आहे.

दीपिका पादुकोण टॉप ३ निवडण्यासाठी बिग बॉसच्या घरात गेली़ तिने टॉप ३ स्पर्धकांची घोषणा केली. यादरम्यान शमिताचा पत्ता कट झाला. त्याच्यापाठोपाठ चाहत्यांच्या मतांच्या आधारावर शमिता शेट्टीचं ट्रॉफी जिंकण्याचं स्वप्न पुन्हा एकदा भंगलं. ती या शोच्या विजेतेपदाची मोठी दावेदार मानली जात होती. शमिताला चीअर अप करण्यासाठी तिची बहीण शिल्पा शेट्टी ही सुद्धा बिग बॉस 15 फिनालेमध्ये पोहोचली होती. आज शमिताचं जिंकणार, असा अंदाज यावरून अनेकांनी बांधला होता. फिनाले रेसमधून आऊट होण्याआधी शमिता राकेश बापटसोबत सामी या गाण्यावर किलर डान्स करताना दिसली.