मुंबई : राष्ट्रवादी काँग्रेसचे ज्येष्ठ नेते एकनाथ खडसे यांच्या अडचणी अजून वाढण्याची शक्यता आहे. कारण, खडसे यांच्या पत्नी मंदाकिनी खडसे यांना सक्तवसुली संचलनालय अर्थात ईडीकडून समन्स बजावण्यात आलं आहे. मंदाकिनी खडसे यांना उद्या ईडीसमोर उपस्थित राहण्याचे आदेश देण्यात आले आहेत. भोसरी भूखंड घोटाळा प्रकरणात हे समन्स बजावण्यात आलं असून, पुन्हा एकदा खडसे कुटुंबाच्या अडचणी वाढण्याची शक्यता आहे.
एकनाथ खडसे यांची यापूर्वी ८ जुलै रोजी ईडी कार्यालयात तब्बल ९ तास चौकशी करण्यात आली होती. पुण्यातील भोसरी एमआयडीसी भूखंड व्यवहार प्रकरणात जावई गिरीश चौधरी यांच्या अटकेनंतर खडसेंची चौकशी करण्यात आली होती. त्यावेळी खडसे यांच्या पत्नी मंदाकिनी खडसे यांनाही ईडीने समन्स बजावलं होतं. मंदाकिनी खडसे यांना चौकशीसाठी हजर राहण्याचे आदेश देण्यात आले होते. मात्र, त्यांना एका निवेदनाद्वारे १४ दिवसांची वेळ मागितली होती.
भोसरी येथील जमीन खरेदी प्रकरणी माजी मंत्री एकनाथ खडसे यांचे जावई अटकेत आहेत. याच प्रकरणी मंदाताई खडसे यांना ईडीने उद्या हजर होण्याची नोटीस बजावली आहे. त्या हजर होणार काय या कडेच आता लक्ष आहे. भोसरी गैरव्यवहार प्रकरणी खडसे कुटुंब गोत्यात आले असतांनाच गेल्या आठवड्यात त्यांच्याशीच संबंधीत असणार्‍या मुक्ताई साखर कारखान्याला दिलेल्या कर्जाची माहिती मिळवण्यासाठी ईडीने जिल्हा बँकेला नोटीस बजावली आहे. या बँकेच्या अध्यक्षा रोहिणी खडसे असल्याने राजकीय आणि सहकार क्षेत्रात यामुळे खळबळ उडालेली आहे. यातच आता मंदाताई खडसे यांना ईडीने चौकशीसाठी उपस्थित राहण्याचे समन्स बजावल्याने यात काय होणार ? याकडे सर्वांचे लक्ष लागले आहे.
