नवी दिल्लीः कोरोनाच्या या संकटात देशात ऑक्सिजनचा मोठा तुटवडा जाणवत आहे. अनेक राज्यांना ऑक्सिजनच्या तुटवड्याचा सामना करावा लागतोय. अशा कठीण स्थितीत केंद्र सरकारने मोठा निर्णय घेतला आहे. देशातील ऑक्सिजनचा तुटवडा दूर करण्यासाठी पीएम केअर्स फंड अंतर्गत जिल्हा रुग्णालयांमध्ये आता ५५० हून अधिक ऑक्सिजन प्लांट उभारण्यात येणार आहेत.
ऑक्सिजन प्लांट उभारण्याबाबत पंतप्रधान कार्यालयाकडून माहिती देण्यात आली आहे. पीएम केअर्स फंड अंतर्गत देशात ५५१ मेडिकल ऑक्सिजन उभारण्यास पंतप्रधान मोदींनी मंजुरी दिली आहे. हॉस्पिटल्समध्ये ऑक्सिनजची उपलब्धता वाढवण्यासाठी पंतप्रधान मोदींच्या आदेशनुसार पीएम केअर्स फंड अंतर्गत सार्वजनिक आरोग्य सुविधांसाठी ५५१ ऑक्सिजन उत्पादन प्लांट उभारण्यासाठी मंजुरी दिली आहे, अशी माहिती पंतप्रधान कार्यालयाकडून देण्यात आली आहे.
पीएम केअर्स फंड अंतर्गत सर्व ऑक्सिजन प्लांट हे विविध राज्ये आणि केंद्र शासित प्रदेशांमध्ये जिल्हा सरकारी रुग्णालयांमध्ये उभारले जातील. या ऑक्सिजन प्लांटची खरेदी आरोग्य मंत्रालयाकडून करण्यात येईल. देशातील सार्वजनिक आरोग्य यंत्रणा बळकट करण्याच्या उद्देशाने हे ऑक्सिजन प्लांट उभारण्यात येत आहेत, असं पीएमओकडून सांगण्यात आलं. हाउस कॅप्टिव्ह ऑक्सिजन जनरेशन सुविधा जिल्हा रुग्णाल्यांची ऑक्सिजनची दैनंदिन आवश्यकता पूर्ण करतील. याशिवाय लिक्विड ऑक्सिजन कॅप्टिव्ह ऑक्सिजन जनरेशनसाठी टॉपअपचे काम करतील. कुठल्याही संकटाच्या स्थितीत अशा प्रकारचे ऑक्सिजन प्लांट हे रुग्णांना सुरळीत ऑक्सिजन पुरवठा देण्याचे काम करतील. यामुळे रुग्णांच्या उपचारात कुठलीही अडचण निर्माण होणार नाही, अशी माहिती पीएमओकडून देण्यात आली.
केंद्रीय गृहमंत्री अमित शहा यांनी या निर्णयाबद्दल पंतप्रधान मोदींचे आभार मानले आहेत. कोरोना संकटाच्या या काळात पीएम केअर्स फंड अंतर्गत देशातील विविध जिल्हा सार्वजनिक रुग्णालयांमध्ये ५५१ ऑक्सिजन जनरेशन प्लांट उभारण्याचा निर्णयाबद्दल आभार, असं अमित शहांनी ट्विट करून म्हटलं आहे.
