लखनऊ : उत्तर प्रदेशात अखिल भारतीय आखाडा परिषदेचे अध्यक्ष महंत नरेंद्र गिरी यांच्या संशयास्पद मृत्यूनंतर अयोध्येत आणखी एका साधूची संशयास्पद मृत्यूची बातमी समोर आली आहे. अयोध्येतील एका मंदिराच्या तिसऱ्या मजल्यावरुन पडल्याने साधुचं निधन झालं आहे. मृतक साधुचं नाव मणिराम दास असं आहे. दास यांनी आत्महत्या केली की दुसरं काही घडलं? याबाबतची माहिती अद्याप समजू शकलेली नाही. पोलिसांनी दास यांचा मृतदेह ताब्यात घेऊन शवविच्छेदनासाठी पाठवला आहे. पोलीस या प्रकरणाचा सध्या तपास करत आहेत.
पोलिसांनी केलेल्या प्राथमिक तपासात मृतक साधू हे गेल्या अनेक दिवसांपासून नैराश्यात होते, अशी माहिती समोर आली आहे. पण ते नेमके नैराश्यात का होते? या मागचं कारण अद्याप समजू शकलेलं नाही. पोलीस सध्या मंदिर प्रशासन आणि इतर साधूंकडून माहिती घेत आहेत. याशिवाय पोलीस दास यांचे फोन रेकॉर्डही चेक करत आहेत.
दरम्यान, या घटनेमुळे अयोध्येतील साधू, महंतांमध्ये शोकाकूळ वातावरण आहे. मणिराम गेल्या काही दिवसांपासून खूप कमी बोलत होते. याशिवाय ते हल्ली एकटेच राहणं पसंत करत होते. ते आपल्या खोलीत एकटेच राहत होते.
