बाजारभावाप्रमाणेच रेमडेसिव्हीर इंजेक्शनची खरेदी; मुंबई महापालिका आयुक्तांनी फेटाळले भाजपचे आरोप

मुंबई : मुंबई पालिकाने रेमडेसिव्हीरची खरेदी ही बाजारभावाप्रमाणेच केली आहे, असे स्पष्टीकरण पालिका आयुक्त इक्बालसिंह चहल यांनी दिले आहे. पालिका आयुक्तांनी विविध महानगरपालिकेने केलेल्या खरेदीची यादीच जाहीर केली आहे. मुंबई महापालिकेने रेमडेसिव्हीर इंजेक्शनच्या खरेदीत भ्रष्टाचार केल्याचा भाजपचा आरोप चहल यांनी फेटाळला आहे.

मुंबईतील महानगरपालिकेने रेमडेसिव्हीर इंजेक्शनची खरेदी बाजाराभावाप्रमाणे केली आहे. महापालिकेने प्रत्येक रेमडेसिव्हीर इंजेक्शन हे 1 हजार 568 रुपयांना खरेदी केले आहे. तसेच याच दराने देशातील काही महानगरपालिकांसह राज्य सरकारने हे इंजेक्शन खरेदी केले आहे, असा दावा आयुक्त इक्बाल सिंह चहल यांनी केला आहे. तसेच याबाबतच खरेदीची एक यादीही त्यांनी जारी केली आहे.

मुंबई महापालिकेने 1 लाख 568 रुपये या दराने मुंबईकरांसाठी दोन लाख रेमडेसिव्हीर इंजेक्शनची खरेदी केली होती. मात्र भाजपचे स्थायी समिती सदस्य विनोद मिश्रा यांनी हाफकीन इन्स्टीट्यूटने 665 रुपये दराने 20 हजार इंजेक्शन खरेदी केल्याचा दावा केला होता. मात्र पालिका तिप्पट दरात रेमडेसिव्हीर इंजेक्शनची खरेदी करीत असल्याचा आरोप भाजपने केला होता. तसेच याप्रकरणी चौकशी करण्याची मागणी केली आहे.

याबाबत मुंबईतील महानगरपालिकेने रेमडेसिव्हीर इंजेक्शनची खरेदी बाजाराभावाप्रमाणे केली आहे. त्याचबरोबर नवी मुंबई महानगरपालिका, सुरत महानगरपालिका, गुजरात मेडिकल सर्व्हिस कॉर्पोरेशन, वैद्यकीय शिक्षण आयुक्तालय, मध्य प्रदेश, आसाम राज्य सरकार तसेच सातारा जिल्हा रुग्णालय अशा अनेक ठिकाणी याच दराने औषधांची खरेदी करण्यात आली आहे, असा दावाही आयुक्तांनी केला आहे. मुंबई महानगरपालिकेने या इंजेक्शनचा पुरवठा करण्यासाठी सिप्ला या कंपनीशीही चर्चा केली होती. मात्र सध्याच्या परिस्थितीत पुरवठा करणं शक्य नसल्याचे कंपनीकडून सांगण्यात आले होते.

ऑक्सिजन पुरवठ्यावर मुंबई महापालिकेची करडी नजर

मुंबईतील कोरोनाग्रस्तांची वाढती संख्या पाहता राज्य शासन व मुंबई महापालिका गंभीर आजारी रुग्णांसाठी ऑक्सिजनचा पुरवठा सुरळीत होण्यासाठी आणि कोरोनाग्रस्तांचे प्राण वाचविण्यासाठी प्रयत्नशील असून ऑक्सिजन पुरवठयावर करडी नजर ठेवण्यात येणार आहे. मुंबईतील ऑक्सिजनच्या पुरवठ्यासंदर्भात समन्वय राखण्यासाठी महापालिकेच्यावतीने ६ समन्वय अधिकाऱ्यांची तातडीने नियुक्ती करण्यात आली आहे. यासंदर्भांतील माहिती मुंबई महापालिका आयुक्त इकबाल सिंह चहल यांनी दिली. मुंबईतील कोरोना रुग्णांसाठी ऑक्सिजन पुरवठा सुरळीत राखण्याबाबत राज्याचे पर्यावरण, पर्यटन व राजशिष्टाचार मंत्री तथा मुंबई उपनगर जिल्हा पालकमंत्री आदित्य ठाकरे, मुंबई महापालिका आयुक्त इक्बाल चहल, अन्न व औषध प्रशासन आयुक्त अभिमन्यु काळे आणि ऑक्सिजन पुरवठादार यांच्या प्रमुख उपस्थितीत आज ऑनलाईन प्रणालीद्वारे आढावा बैठक घेण्यात आली.

पालकमंत्री आदित्य ठाकरे यांनी या बैठकीत कोरोनाबाधित रुग्णांच्या उपचारासाठी मुंबईमध्ये आवश्यक त्या सर्व उपाययोजना शासन व मुंबई महापालिकेकडून करण्यात येत असल्याचे सांगितले. तसेच २ लाख रेमडेसिवीर इंजेक्शनची मागणी करण्यात आली आहे. बेड्सची संख्यादेखील वाढवली जात आहे. त्यामध्ये ऑक्सिजन पुरवठ्याची सोय अधिकाधिक केली जात आहे. त्यामुळे सध्या होत असलेला ऑक्सिजन पुरवठा सुरळीत राखण्याबाबत सर्व यंत्रणांनी आवश्यक तो समन्वय राखणे गरजेचे आहे. त्यासाठी लागणारे सहकार्य शासनाकडून करण्यात येईल, असे आदित्य ठाकरे यांनी सांगितले.

मुंबई महापालिका क्षेत्रात महानगरपालिका, शासकीय आणि खासगी अशी एकूण १५० कोविड रुग्णालये आहेत. या रुग्णालयांमध्ये सध्या २० हजार बेड्स आहेत. येत्या आठवड्यात या बेड्सची संख्या २२ हजार इतकी होणार आहेत. मागील १५ दिवसात मुंबईतील कोरोना रुग्णांची दैनंदिन संख्या ८ ते १० हजार दरम्यान स्थिरावली असली, तरी पुढील १५ दिवस आणखी महत्वाचे आहेत, असे पालिका आयुक्त इकबाल सिंह चहल यांनी सांगितले.

६ समन्वय अधिकाऱ्यांची तातडीने नियुक्ती

रुग्णांची वाढलेली संख्या आणि त्यांना लागणारा ऑक्सिजन पाहता पुरवठ्याची व्यवस्था सुरळीत राखणे अत्यंत आवश्यक आहे. मुंबईतील रुग्णालयांना सध्या २३५ मेट्रिक टन इतका ऑक्सिजन पुरवठा होत असून वाढती रुग्ण संख्या पाहता अधिकची मागणी शासनाकडे केली आहे, असे चहल म्हणाले. मुंबईतील ऑक्सिजन पुरवठ्यासंदर्भात समन्वय राखण्यासाठी महापालिकेच्या वतीने ६ अधिकाऱ्यांची समन्वय अधिकारी म्हणून तातडीने नियुक्ती करण्यात येत आहे.