चेन्नई : तामिळनाडू विधानसभेचे अर्थसंकल्पीय अधिवेशन आजपासून सुरू झाले आहे. राज्याचे अर्थमंत्री पीटीआर पलानीवेल त्यागराजन यांनी राज्याच्या इतिहासातील पहिले ई-बजेट सादर केले. तामिळनाडू सरकारने पेट्रोल कर तीन रुपये प्रति लीटर कमी करण्याची मोठी घोषणा केली आहे. यामुळे राज्याला दरवर्षी ११६० कोटी रुपयांचे नुकसान होणार आहे. याशिवाय महिला सरकारी कर्मचाऱ्यांसाठी प्रसूती रजा ९ महिन्यांवरून १२ महिने करण्यात आली आहे. ५०० कोटी रुपये खर्च करून हवामान बदलासाठी केंद्र स्थापन केले जाईल. राज्यातील सर्व बचतगटांना २० हजार रुपये क्रेडिट म्हणून वितरित केले जाणार आहेत.
अर्थमंत्री म्हणाले, राज्यातील सर्व ७९,३९५ छोट्या गावांमधील प्रत्येक व्यक्तीला दररोज ५५ लिटर शुद्ध पिण्याचे पाणी पुरवण्यासाठी पावले उचलली जातील. तसेच, एक लाखापेक्षा जास्त लोकसंख्या असलेल्या २७ शहरांमध्ये भूमिगत गटार योजना लागू केली जाईल.
तामिळनाडूमध्ये, मुख्य विरोधी पक्ष एआयएडीएमकेच्या आमदारांनी निषेध म्हणून शुक्रवारी अधिवेशनादरम्यान सभागृहातून बाहेर पडले. खरेतर, स्पीकर अप्पावू यांनी विरोधी पक्षाला बोलू दिले नाही, यामुळे आमदारांनी रागाने वॉकआउट केले. अर्थमंत्री पलानीवेल त्यागराजन यांच्या अर्थसंकल्पाच्या सादरीकरणापूर्वीच विरोधी पक्षनेते के पलानीस्वामी यांनी उभे राहून बोलण्यास सुरुवात केली.
सभापती अप्पावू यांनी पलानीस्वामींना परवानगी नाकारत म्हटले की पलानीस्वामी सोमवारी बोलू शकतात. कारण, बजेट आधी सादर करावे लागेल. त्यानंतर अप्पावू यांनी राजन यांना राज्याचा पहिला पेपरलेस इलेक्ट्रॉनिक बजेट सादर करण्यास सांगितले. यावर निषेध म्हणून, एआयएडीएमके सदस्यांनी सभागृहातून वॉकआऊट केले.
तामिळनाडूचे पहिले विशेष कृषी बजेट १४ ऑगस्ट रोजी राज्याचे कृषी मंत्री एमआरके पनीरसेल्वम सादर करणार आहेत. सलग चार दिवस राज्याच्या अर्थसंकल्प आणि कृषी अर्थसंकल्पावर सभागृहात चर्चा होईल.
