नवी दिल्ली: कोरोनामुळे अर्थव्यवस्था मंदावलेली असताना एका सकारात्मक बातमी आहे. जुलै महिन्यात कोरोनाची दुसरी लाट बहुतांश प्रमाणात ओसरल्याचे पाहायला मिळाले. याचा फायदा अर्थव्यवस्थेला झाला असून, जुलै महिन्यात जीएसटी महसुलात प्रचंड वाढ झाली आहे. यामुळे केंद्रातील मोदी सरकारला दिलासा मिळाला आहे. गेल्या वर्षीच्या तुलनेत कर संकलनात ३३ टक्के वाढ झाली आहे.
कोरोनाच्या दुसऱ्या लाटेचा परिणाम अर्थव्यवस्थेवरही झाल्याचे दिसून आले. कोरोनाचे रुग्ण मोठ्या प्रमाणात वाढल्याने महाराष्ट्रासह काही राज्यांनी लॉकडाऊन, कर्फ्यू अशा प्रकारचे निर्बंध घातले होते. त्यामुळे उद्योग, व्यापार, व्यवसाय, दुकाने बंद राहिली. परिणामी वस्तू आणि सेवा कर संकलनही कमी झाले. मात्र, जुलै महिन्यात कोरोनाची दुसरी लाट बऱ्यापैकी कमी झाल्याचे दिसून आल्यानंतर राज्यांनी निर्बंधांमध्ये शिथिलता आणली. याचा सकारात्मक परिणाम अर्थचक्रावर होऊन जुलै महिन्यात विक्रमी जीएसटी संकलन झाल्याचे सांगितले जात आहे.
अर्थ मंत्रालयाकडून जीएसटीची आकडेवारी रविवारी जाहीर करण्यात आली. जुलै महिन्यात जीएसटीमधून १,१६,३९३ कोटींचा महसूल मिळाला आहे. यात सीजीएसटी २२,१९७ कोटी, एसजीएसटी २८,५४१ कोटी आणि आयजीएसटी ५७,८६४ कोटी रुपये (वस्तूंच्या आयातीवर वसूली झालेल्या २७,९०० कोटी रुपयांसह) आणि उपकर ७९१० कोटी रुपये (वस्तुंच्या आयातीवर वसूली झालेल्या ८१५ कोटी रुपयांसह) यांचा समावेश आहे.
दरम्यान, जीएसटी महसूल सलग आठ महीने एक लाख कोटी रुपयांवर राहिला होता. जून महिन्यात जीएसटीतून सरकारला ९२,८४९ कोटींचा महसूल मिळाला होता. मे महिन्यापाठोपाठ जूनमध्ये कर महसूल कमी झाल्याने सरकारची चिंता वाढली होती. मे महिन्यात १.०२ लाख कोटींचा कर मिळाला होता. जून २०२१ मध्ये तो १ लाख कोटी रुपयांच्या खाली आला. मे २०२१ महिन्यातील ई-वे बिल डेटा पाहिला असता एप्रिलच्या तुलनेत मे महिन्यात ई-वे बिल ३० टक्क्यांहून कमी आहेत. त्याचा फटका जीएसटी संकलनाला बसला असल्याचे सरकारने म्हटले आहे.
