राज्याकडे अधिकार नसताना कायदा करुन फडणवीसांनी मराठा समाजाची फसवणूक केली : अशोक चव्हाण

मुंबई : राज्याकडे अधिकार नसताना तत्कालिन मुख्यमंत्री देवेंद्र फडणवीस यांनी मराठा आरक्षणाचा कायदा करुन मराठा समाजाची फसवणूक केली असा आरोप मराठा आरक्षण उपसमितीचे अध्यक्ष अशोक चव्हाण यांनी केला आहे. फडणवीसांनी परस्पर कायदा केला, असं चव्हाण म्हणाले. सर्वोच्च न्यायालयाने मराठा आरक्षण रद्द करण्याचा निर्णय आज घेतला. या पार्श्वभूमीवर अशोक चव्हाण यांनी माध्यमांशी संवाद साधला. यावेळी बोलताना त्यांनी सर्वोच्च न्यायालयाचा निकाल अतिशय निराशजनक असल्याचं म्हटलं.

देवेंद्र फडणवीस यांनी सभागृहात कोणतीही चर्चा न करता कायदा केला. केंद्राने १०२ वी घटनादुरुस्ती १४ ऑगस्ट २०१८ ला केली. तर १५ नोव्हेंबर २०१८ ला गायकवाड समितीचा अहवाल आला आणि ३० नोव्हेंबरला मराठा आरक्षणाचा कायदा केला. १०२ व्या घटना दुरुस्तीनुसार राज्य सरकारला आरक्षण देता येत नसताना देवेंद्र फडणवीस यांनी मराठा आरक्षणाचा कायदा करुन मराठा समाजाची फसवणूक केली, असं अशोक चव्हाण म्हणाले.

सुप्रीम कोर्टाच्या निर्णयाबाबत राज्य सरकारची भूमिका मांडत आहे. आजचा निकाल निराशाजनक आहे. मराठा समाजसाठी, महाराष्ट्रावर अन्याय करणारा निकाल आहे. राज्यात हा विषय असताना संपूर्ण संविधानिक प्रक्रिया पूर्ण करुन निर्णय घेण्यात आला. त्यानंतर कॅबिनेटनं कायदा मंजूर केला. मुंबई उच्च न्यायालयात आरक्षण टिकलं. देवेंद्र फडणवीस यांच्या काळातच सर्वोच्च न्यायालयात आव्हान देण्यात आलं होतं. फडणवीस सरकारनं जे वकील लावले होते. तेच वकील महाविकासआघाडी सरकारनं वकील लावले होते.

देवेंद्र फडणवीस यांच्या काळात जितक्या बैठका घेतल्या नसतील तितक्या बैठका घेतल्या गेल्या. सर्वाच्या सहकार्यानं सर्वोच्च न्यायालयात भूमिका मांडली. महाराष्ट्र सरकारनं सर्वोच्च न्यायालयात बाजू मांडली त्यात समन्वयाचा अभाव कधीही नव्हता, असं अशोक चव्हाण म्हणाले. इंद्रा सहानीचा केसचा लॉ सर्वोच्च न्यायालयानं आणि केंद्र सरकारनं ग्राह्य धरला आहे. गायकवाड समितीचा अहवाल, देवेंद्र फडणवीस सरकारनं केलेला कायदा अस्वीकृत केला, असं अशोक चव्हाण म्हणाले.

केंद्र सरकारच्या अ‍ॅटर्नी जनरल यांनी १०२ व्या घटनादुरुस्तीनंतर राज्यांना अधिकार नाहीत, असं म्हटलं. त्यांनी पुन्हा राज्यांना अधिकार आहेत, असं म्हणाले. १०२ वी घटनादुरुस्ती १४ ऑगस्ट २०१८ ला झाली. १५ नोव्हेंबर २०१८ ला गायकवाड समितीचा अहवाल आला. ३० नोव्हेंबरला कायदा केला. १०२ व्या घटनादुरुस्तीनंतर राज्याला अधिकार राहिलेला नाही, असं सर्वोच्च न्यायालयानं निक्षून सांगितलेलं आहे. देवेंद्र फडणवीस यांनी अधिकार नसताना कायदा केला होता. त्यानंतर आता फसवणूक केली जात आहे.

मराठा आरक्षणाचा कायदा १०२ व्या घटनादुरुस्तीनंतर केल्यानं सर्वोच्च न्यायालयानं रद्द केला, असं अशोक चव्हाण म्हणाले. मराठा समाजाला आरक्षण देण्यासंदर्भातचा लढा अजून संपलेला नाही. आमचा अहवाल केंद्र सरकारकडे पाठवू, राष्ट्रीय मागासवर्ग आयोगाकडे पाठवू, त्यानंतर केंद्रानं मराठा समाजाच्या आरक्षणासंदर्भात निर्णय घ्यावा.

गायकवाड कमिशनचा अहवाल हा इंग्रजी आहे. त्यामुळे त्या अहवालाचं भाषांतर करण्याचा मुद्दा नाही. मराठा आरक्षणाच्या निर्णयावर दिशाभूल करु नये, असं अशोक चव्हाण म्हणाले. सभागृहामध्ये हा निर्णय पाच ते दहा मिनिटात चर्चेशिवाय मंजूर करण्यात आला आहे.

१०२ व्या घटना दुरुस्तीआधीच आरक्षणाचा कायदा झाला; फडणवीसांचं प्रत्युत्तर

देवेंद्र फडणवीस यांनी अशोक चव्हाण यांच्या आरोपांना प्रत्युत्तर दिलं आहे. १०२ व्या घटना दुरुस्तीआधी आरक्षणाचा कायदा झाला. हा कायदा १०२ व्या घटना दुरुस्तीने बाधित होत नाही, कारण आमचा कायदा त्याच्या आधीचा आहे, त्यामुळे आम्ही दिशाभूल केलेली नाही, असं फडणवीस म्हणाले.

फडणवीस म्हणाले, राज्य सरकारची पत्रकार परिषद पाहिली. राज्य सरकारने अपेक्षेप्रमाणेच आपलं स्वत:चं अपयश लपवण्याकरिता केंद्र सरकार आणि मागील सरकारवर सगळं ढकलण्याचं काम केलं आहे. आतापर्यंत राजकीय बोलायचं ठरवलं नव्हतो पण स्पष्ट आरोप करतो की ५० वर्षांत यांचं सरकार आरक्षण देऊ शकलं नाही ते आरक्षण आमच्या सरकारने दिल्यानंतर हे आरक्षण टिकलं तर भाजपच्या सरकारला क्रेडिट मिळेल म्हणून या आरक्षणाचा मुडदा पाडण्याचं काम या सरकारने केला आहे.

आरक्षणाचा मूळ कायदा घटनादुरुस्तीआधीचा आहे. १०२ घटना दुरुस्ती त्यानंतर केली. महाविकास आघाडी सरकार हे सर्वोच्च न्यायालयात मांडण्यात कमी पडलं. महाविकास आघाडी सरकारनं दिशाभूल केली आहे. दिशाभूल करत हे सरकार आरक्षण केंद्राच्या गळ्यात अडकवत आहे. याशिवाय, सरकारने कायद्यातील परिशिष्ठांचं भाषांतर सरकारनं केलं नाही, असं देखील फडणवीस म्हणाले.