मुंबई : ‘बिग बॉस’चा १३ वा सीझन गाजवणारा अभिनेता सिद्धार्थ शुक्लाचे गुरूवारी निधन झाले. हृदयविकाराच्या झटक्याने त्याची प्राणज्योत मालवली. मुंबईच्या कूपर रूग्णालयाने तसेच मुंबई पोलिसांनी सिद्धार्थच्या निधनाच्या वृत्ताला दुजोरा दिला आहे. सिद्धार्थच्या निधनामुळे टीव्ही इंडस्ट्री व त्याच्या चाहत्यांना मोठा धक्का बसला आहे. चाहते शोकाकूल आहेत. वयाच्या अवघ्या ४० व्या वर्षी सिद्धार्थने जगाचा निरोप घ्यावा, यावर अद्यापही चाहत्यांना विश्वास बसत नाहीये. सिद्धार्थ शुक्लाच्या मागे आई व दोन बहिणी आहेत.
सिद्धार्थने झोपण्यापूर्वी काही औषधं घेतली होती. पण नंतर तो उठलाच नाही. त्याने कोणती औषधं घेतली होती, हे अद्याप स्पष्ट झालेले नाही. रूग्णालयात नेले असता, त्याला मृत घोषित करण्यात आले. रूग्णालयाने त्याचा मृत्यू हृदयविकाराच्या झटक्याने झाल्याचे स्पष्ट केले आहे. गुरूवारी पहाटे रूग्णालयात येण्यापूर्वीच त्याचे निधन झाल्याचे रूग्णालयाने म्हटले आहे. सिद्धार्थ शुक्लाचा शवविच्छेदन अहवाल प्रतीक्षेत असून, त्याच्यासोबत राहणाऱ्या लोकांचे स्टेटमेंट घेण्यात येणार असल्याचे पोलिसांचे म्हणणे आहे. सध्या मुंबई पोलिसांची टीम कपूर हॉस्पिटलमध्ये पोहोचली आहे. दिवंगत सिद्धार्थची बहीण आणि मेहुणाही रुग्णालयात पोहोचले आहेत.
सिद्धार्थ शुक्ला टीव्ही इंडस्ट्रीचा लोकप्रिय चेहरा होता. बिग बॉसचा १३ सिझन त्यानं जिंकला होता. याशिवाय ‘खतरों के खिलाडी ७’चाही तो विजेता होता. बालिका वधू या मालिकेतून तो घराघरात पोहोचला होता. सिद्धार्थ मूळचा मुंबईचाच होता. त्याला मॉडेलिंग आणि अभिनयात कधीच रस नव्हता. सिद्धार्थला नेहमीच बिझनेस करायचा होता. मात्र, त्याच्या लुक्समुळे लोक त्याचे खूप कौतुक करायचे. २००४ मध्ये एकदा, आईच्या सांगण्यावरून, सिद्धार्थने मॉडेलिंग स्पर्धेत भाग घेतला. पोर्टफोलिओ न घेता सिद्धार्थ तिथे पोहोचला होता. ज्युरीने सिद्धार्थचे लूक पाहून त्याची निवड केली होती. इथूनच त्याच्या प्रवासाची सुरुवात झाली होती.
सिद्धार्थने आईच्या सांगण्यावरून अनिच्छेने या स्पर्धेत भाग घेतला होता. पण, त्याला माहित नव्हते की यामुळे त्याचे नशीब बदलेल. सिद्धार्थने ही स्पर्धा जिंकली. यानंतर सिद्धार्थला २००८ मध्ये तुर्कीमध्ये होणाऱ्या जगातील सर्वात मोठ्या मॉडेलिंग शोमध्ये पाठवण्यात आले. तिथेही सिद्धार्थने जिंकून देशाचे नाव उंचावले. तिथून परत आल्यानंतरही सिद्धार्थने मॉडेलिंग सुरू ठेवले. नंतर त्याने फेअरनेस क्रीमच्या व्यावसायिक जाहिरातीतही काम केले. या जाहिरातीनंतर त्यांना ‘बाबुल का आंगन छुटे ना’ या टीव्ही शोमध्ये मुख्य भूमिका साकारली. मात्र, त्याला या मालिकेतून फारशी प्रसिद्धी मिळाली नाही. यानंतर त्याला कलर्स टेलिव्हिजनचा शो ‘बालिका वधू’ मध्ये ‘शिव’ची भूमिका मिळाली. सिद्धार्थने या मालिकेद्वारे प्रेक्षकांच्या मनाला भुरळ पाडली.
अभिनेता, होस्ट आणि मॉडेल आहे जो हिंदी टेलिव्हिजन आणि चित्रपटांमध्ये प्रामुख्यानं काम करत होता. तो ‘ब्रोकन बट ब्यूटीफुल ३’, ‘बालिका वधू’ आणि ‘दिल से दिल तक’मधील भूमिकांसाठी ओळखला जातो. तो बिग बॉस १३ आणि फियर फॅक्टर: खतरों के खिलाडी ७ च्या रिअ‍ॅलिटी शोचा विजेता आहे. त्यानं सावधान इंडिया आणि इंडियाज गॉट टॅलेंट हे शो होस्ट केले आहेत. त्याने डिसेंबर २००५ मध्ये आशिया, लॅटिन अमेरिका आणि युरोपमधील इतर ४० सहभागींना हरवून जगातील सर्वोत्कृष्ट मॉडेलचं विजेतेपद पटकावले. २००८ च्या ‘बाबुल का आंगन छुटे ना’ या शोमधील मुख्य भूमिकेतून त्यानं अभिनय क्षेत्रात पदार्पण केलं. २०१४ मध्ये, शुक्लानं ‘हम्प्टी शर्मा की दुल्हनिया’मध्ये सहाय्यक भूमिकेतून बॉलिवूडमध्ये पदार्पण केले.
सिद्धार्थ आणि शहनाजची हिट जोडी
कलर्स या हिंदी वाहिनीवरील बिग बॉस १३ या शोमध्ये सिद्धार्थ शुक्ला आणि शहनाज गिल यांची जोडी चांगलीच गाजली होती. या शोमध्ये दोघे एकमेकांची काळजी घेताना दिसले होते. त्यांची केमिस्ट्री चांगलीच गाजली होती. शो संपल्यानंतरही चाहते या दोघांना एकत्र पाहू इच्छित होते. नुकतंच, सिद्धार्थ आणि शहनाज हे करण जौहरच्या बिग बॉस ओटीटीमध्ये सहभागी झाले होते. त्यावेळी त्यांनी स्पर्धकांसोबत धमाल मस्ती केली होती.
‘बालिका वधू’च्या लाडक्या जोडीची अकाली एक्झिट
विचित्र योगायोग म्हणजे ‘बालिका वधू’मधील त्याची सहकलाकार अर्थात आनंदीची भूमिका साकारलेली अभिनेत्री प्रत्युषा बॅनर्जी हिचीही अकाली एक्झिट झाली होती. प्रेक्षकांच्या या लाडक्या जोडीने वेगवेगळ्या घटनांमध्ये असा अचानक निरोप घेतल्याने हळहळ व्यक्त होत आहे. अभिनेत्री प्रत्युषा बॅनर्जीने १ एप्रिल २०१६ रोजी वयाच्या अवघ्या २४ व्या वर्षी गळफास घेऊन आत्महत्या केली होती. ‘बालिका वधू’ मालिकेत लीपनंतर आनंदीची भूमिका प्रत्युषा बॅनर्जीच्या वाट्याला आली होती. तर तिच्या दुसऱ्या नवऱ्याच्या अर्थात शिव उर्फ शिवराज शेखरच्या भूमिकेत सिद्धार्थ शुक्ला झळकला होता. या दोघांची जोडी प्रेक्षकांच्या पसंतीस उतरली होती. २०१६ मध्ये अवघ्या २४ व्या वर्षी आनंदीने, तर पाचच वर्षात वयाच्या ४० व्या वर्षी सिद्धार्थनेही जगाचा निरोप घेतल्याने सर्वांच्या हृदयाला चटका लागला आहे.
