मुंबई : नाशिकमध्ये ठाकरेंच्या सेनेला पुन्हा हादरा बसणार आहे. सुधाकर बडगुजर, विलास शिंदे यांच्यानंतर आता नवनियुक्त महानगर प्रमुख मामा राजवाडे भाजपमध्ये प्रवेश करणार आहेत. आठवडाभरापूर्वीच मामा राजवाडेंची महानगर प्रमुखपदी नियुक्ती झाली होती. तर नाशिकमधील तीन नगरसेवक आज भाजपात प्रवेश करत आहेत. दरम्यान, ही भारतीय जमवा जमव पार्टीची (BJP) कमाल आहे. नाशिकमध्ये शिवसेना पदाधिकाऱ्यांवर आधी गुन्हे दाखल केले. हे सर्व पदाधिकारी अटकपूर्व जामीनासाठी न्यायालयात गेले. पोलीस अटक करतील म्हणून हे सगळे जण फरार झाले. या सगळ्यांचा क्लायमॅक्स असा की, हे सगळे फरार (भाजपसाठी गुन्हेगार) आज भाजपत प्रवेश करत आहेत. भारतीय जमवा जमव पार्टीने महाराष्ट्राची वाट लावली आहे. सत्ता, पैसा, दहशत… दुसरे काही नाही!, अशी घणाघाती टीका खासदार संजय राऊत यांनी या पक्ष प्रवेशावर केली आहे.
विधानसभा निवडणुकीत महायुतीला कौल मिळाला. त्यामुळे भाजपमध्ये इनकमिंग वाढले आहे. स्थानिक स्वराज्य संस्थांच्या निवडणुकींचा मार्ग मोकळा झाल्याने पक्षांतराचा वेग वाढला आहे. सुधाकर बडगुजर यांच्या पक्ष प्रवेशावेळी मोठा गदारोळ दिसला होता. पण त्यांनी मुख्यमंत्री देवेंद्र फडणवीस यांची भेट घेतल्यानंतर प्रचंड विरोध असतानाही बडगुजर यांचा पक्ष प्रवेश झाला. त्यांच्या पाठोपाठ आता इच्छुकांची रिघ लागली आहे. स्थानिक भाजप पदाधिकाऱ्यांची समजूत काढण्यात आल्याने आता इतर पक्षातील नेते, पदाधिकार्यांना होणारा विरोध मावळला आहे.
आज भाजपमध्ये मेगा प्रवेश सोहळा
सुनील बागुल (शिवसेना उपनेते, उबाठा), मामा राजवाड़े (महानगर प्रमुख, उबाठा), गणेश गिते (माजी स्थायी समितीसभापती), सचिन मराठे (उपजिल्हाप्रमुख, माजी नगरसेवक, उबाठा), प्रशांत दिवे (माजी नगरसेवक, उबाठा), सीमा ताजने (माजी नगरसेविका,उबाठा), कमलेश बोडके (माजी नगरसेवक), बाळासाहेब पाठक (जिल्हा संघटक, उबाठा), गुलाब भोये (उपजिल्हा प्रमुख, उबाठा), कन्नु ताजने (उपजिल्हा प्रमुख, उबाठा), शंभु बागुल (युवसेना विस्तारक, उबाठा), अजय बागुल (श्रमिक सेना जिल्हाप्रमुख) हे आज भाजपमध्ये प्रवेश करणार असल्याने शिवसेना ठाकरे गटाला मोठा धक्का बसणार आहे.
