रांची: बिहारचे माजी मुख्यमंत्री आणि राष्ट्रीय जनता दलाचे सुप्रीमो लालू प्रसाद यांना सीबीआयच्या विशेष न्यायालयाने मोठा दणका दिला आहे. चारा घोटाळ्यातील सर्वात मोठ्या आणि पाचव्या नंबरच्या डोरंडा कोषागार प्रकरणात दोषी ठरलेले लालू प्रसाद यादव यांना ५ वर्षांची शिक्षा सुनावली आहे. यासोबतच ६० लाखांचा दंडही ठोठावण्यात आला आहे.
सीबीआय न्यायाधीश एसके शशी यांच्या विशेष न्यायालयाने १५ फेब्रुवारी रोजी लालूंसह ३८ जणांना दोषी ठरवत शिक्षेवर सुनावणीची तारीख २१ फेब्रुवारी निश्चित केली होती. लालू यादव सध्या रांची रिम्समध्ये उपचार घेत आहेत.
विशेष सीबीआय न्यायालयाने लालू प्रसाद यादव यांना आयपीसीच्या कलम ४०९, ४२०, ४६७, ४६८, ४७१, कट रचण्याशी संबंधित कलम १२०बी आणि भ्रष्टाचार प्रतिबंधक कायद्याच्या कलम १२(२) अंतर्गत दोषी ठरवले आहे. या प्रकरणात सीबीआयने एकूण १७० आरोपींविरुद्ध आरोपपत्र दाखल केले होते, तर २६ सप्टेंबर २००५ रोजी १४८ आरोपींवर आरोप निश्चित करण्यात आले होते. चार वेगवेगळ्या चारा घोटाळ्यात १४ वर्षांची शिक्षा झालेल्या लालूप्रसाद यादव यांच्यासह ९९ जणांविरुद्ध सर्व पक्षकारांचा युक्तिवाद ऐकल्यानंतर न्यायालयाने आपला निकाल राखून ठेवला होता.
चारा घोटाळ्याशी संबंधित या प्रकरणात २९ जानेवारी रोजी बचाव पक्षाच्या वतीने युक्तिवाद पूर्ण केल्यानंतर, सीबीआय विशेष न्यायालयाने आपला निर्णय राखून ठेवला होता. सुमारे २३ वर्षे जुने हे प्रकरण १९९० ते १९९५ दरम्यान झारखंडच्या डोरंडा येथे असलेल्या ट्रेझरीमधून १३९.३५ कोटी रुपये बेकायदेशीरपणे काढण्याबाबतचे आहे.
या खटल्यात ७ ऑगस्ट २०२१ रोजी फिर्यादी पक्षाच्या वतीने युक्तिवाद पूर्ण झाला, ज्यामध्ये एकूण ५७५ साक्षीदारांचे जबाब घेण्यात आले. तर बचाव पक्षाच्या वतीने २९ जानेवारी रोजी ११० आरोपींचा युक्तिवाद पूर्ण झाला. लालू प्रसाद यांचाही यात समावेश आहे. बचाव पक्षाचे वकील संजय कुमार यांच्या म्हणण्यानुसार, लालू प्रसाद यांना चारा घोटाळ्याच्या ४ प्रकरणांमध्ये दोषी ठरवण्यात आले आहे. यात चाईबासा कोषागारातून बेकायदेशीर पैसे काढण्याचे दोन प्रकरण आहेत, लालू प्रसाद यांना देवघर आणि दुमका कोषागार प्रकरणात जामीन मिळाला आहे.
