नवी दिल्ली : आयपीएलच्या २३ व्या सामन्यात चेन्नई सुपर किंग्सने सनरायजर्स हैदराबादवर ७ गडी राखून दमदार विजय मिळवला. हैदराबादने चेन्नईला विजयासाठी १७२ धावांचे आव्हान दिले होते. हे विजयी आव्हान चेन्नईने ३ गडी गमावून पूर्ण केले. सलामीवीर ऋतुराज गायकवाड आणि फॅफ डु प्लेसिस चेन्नईच्या विजयाचे शिल्पकार ठरले. गायकवाडने ७५, तर फॅफने ५६ धावांची खेळी केली. या खेळीसह फॅफने ऑरेंज कॅप पटकावली आहे.
या विजयासह चेन्नईच्या संघाने गुणतालिकेत विराट कोहलीच्या नेतृत्वाखालील आरसीबीच्या संघाला मोठा धक्का दिला आहे. या सामन्यापूर्वी चेन्नईच्या संघाने पाचपैकी चार सामने जिंकले होते, तर त्यांना एका लढतीत पराभव पत्करावा लागला होता. त्यामुळे या सामन्यापूर्वी चेन्नईचे आठ गुण होते आणि ते दुसऱ्या स्थानावर होते. पण आजच्या विजयासह चेन्नईच्या संघाचे १० गुण झाले आहेत. सध्याच्या घडीला चेन्नई आणि आरसीबी या दोन्ही संघांचे समान १० गुण झाले आहेत. पण सर्वोत्तम रनरेटच्या जोरावर चेन्नईने अव्वल स्थान पटकावले आहे. पण हैदराबादचा संघ या पराभवानंतर आठव्या स्थानावरच आहे.
विजयासाठी धावांचा पाठलाग करताना चेन्नईची धमाकेदार सुरुवात झाली. चेन्नईच्या ऋतुराज गायकवाड आणि फॅफ डु प्लेसिस या सलामीच्या जोडीने चेन्नईला दमदार सुरुवात मिळवून दिली. यो दोघांनी १२९ धावांची भागीदारी केली. ऋतुराज यावेळी फॅफपेक्षा जास्त आक्रमक दिसत होता. ऋतुराजने यावेळी फक्त ४४ चेंडूंत १२ चौकारांच्या जोरावर ७५ धावांची खेळी साकारली, तर फॅफने ३८ चेंडूंत सहा चौकार आणि एका षटकाराच्या जोरावर ५६ धावा केल्या. या दोघांनी चेन्नईचा विजय यावेळी सुकर केल्याचे पाहायला मिळाले.
हैदराबादच्या संघाने नाणेफेक जिंकत प्रथम फलंदाजी स्वीकारण्याचा निर्णय घेतला. आतापर्यंत फॉर्मात असलेला सलामीवीर जॉनी बेअरस्टो यावेळी लवकर बाद झाला आणि हैदराबादला पहिला धक्का बसला. पण त्यानंतर डेव्हिड वॉर्नर आणि मनीष पांडे यांची चांगली जोडी जमलेली पाहायला मिळाली. वॉर्नर आणि पांडे यांनी यावेळी दुसऱ्या विकेटसाठी १०४ धावांची दमदार भागीदारी रचली.
वॉर्नरचा पराक्रम
वॉर्नरने यावेळी ट्वेन्टी-२० क्रिकेटमधील आपल्या १० हजार धावा पूर्ण केल्या. आतापर्यंत ट्वेन्टी-२० क्रिकेटमध्ये १० हजार धावा करणारा तो चौथा फलंदाज ठरला आहे. वॉर्नरने या सामन्यात दोन षटकारही लगावले. या दोन षटकारांसह आयपीएलमध्ये २०० षटकार पटकावण्याचा विक्रम आता वॉर्नरच्या नावावर झाला आहे. आतापर्यंत काही मोजक्याच फलंदाजांना आयपीएलमध्ये २०० षटकार लगावता आले आहेत. वॉर्नरने या सामन्यात आपले अर्धशतकही साकारले. आयपीएलमध्ये ५० अर्धशतके झळकावणारा तो पहिलाच खेळाडू ठरला आहे. पण अर्धशतक झळकावल्यावर वॉर्नरला जास्त काळ फलंदाजी करता आली नाही. वॉर्नरने यावेळी तीन चौकार आणि दोन षटकारांच्या जोरावर ५७ धावा केल्या. पांडेनेही यावेळी आपले अर्धशतक झळकावले. पांडने यावेळी पाच चौकार आणि एका षटकाराच्या जोरावर ६१ धावांची खेळी साकारली. अखेरच्या षटकांमध्ये केन विल्यम्सन आणि केदार जाधव यांनी आक्रमक फटकेबाजी केली आणि त्यामुळेच हैदराबादला १७१ धावा करता आल्या.
